þriðjudagsmorgunn í Tjarnargötu

Það er furðuleg tilfinning að mæta niður í bæ á svona aðgerðir. Ég hef oftast verið þæga stúlkan, alltaf gert mér far um að láta öllum líka vel við mig.
Þó ég gorti stundum af því að hafa áttað mig á því einhvern tímann á lífsleiðinni að það skipti ekki máli þó öllum líki ekki vel við mann, er þessi þörf þó enn sterk í mér. Mér finnst því hálfundarlegt að vera á leið í bæinn til að vera óþekka barnið. Málið er að ég hef alltaf haft mikla og sterka réttlætiskennd og lét oft hvína í mér við kennara eða samnemendur ef mér þótti þau brjóta gegn henni. Og ég er sannarlega fullviss um það að nú sé verið að brjóta á okkur öllum, að ef einhvern tímann var ástæða til að láta í sér heyra, að tjá óánægju sína, er það núna.
Ég fylltist öryggiskennd og gleði þegar ég sá hvað margir voru mættir. Grófleg talning var upp á 65 manns við Iðnó og okkur fjölgaði í Tjarnargötunni. Ég stóð og hrópaði slagorð en þagði þegar ég var ekki sammála orðnotkun (barnaníðingur finnst mér t.d. ekki eiga við, orðið er notað um allt aðra tegund glæps). Ég söng auðlærðar vísurnar með hinum og ég er stolt af því að hafa verið þarna. Stemningin var mjög góð og þarna var fólk á öllum aldri og ekki varð ég vör við að nokkur væri með skrílslæti.

Ég er ekkert sérstaklega ánægð með að stór mynd hafi birst af mér á einum vefmiðlanna, ég ætla mér alls ekki að vera „andlit byltingarinnar“ frekar en nokkurt okkar sem þarna vorum. En ég skammast mín þó ekki og mun mæta eins oft og ég mögulega get í aðgerðirnar, sem munu halda áfram á næstu vikum.

Ég er ekki frá því að þetta muni magnast upp. Og ég er næstum viss um að einhverjir lögreglumannanna sem stóðu vaktina til verndar ríkisstjórninni muni snúast á sveif með aðgerðarsinnum þegar líða tekur á og þegar ljóst er að það eru þeir sem minnst mega sín sem munu greiða hæsta verðið fyrir sukk valdhafa og auðmanna.

Ég er stolt af því að eiga þátt í því að stjórnarmeðlimir þurftu að skríða inn bakdyramegin á sinn vikulega fund. Ég trúi því að það hafi áhrif á þeirra eigin sjálfsmynd og kannski grói smátt og smátt efasemdir í brjósti þeirra, hrokinn og rostinn lækki þá aðeins. Einar Guðfinnsson var náttúrulega bestur þarna á mbl-myndskeiðinu. Hí á hann!

Djöfull er kalt. Ég var ekkert smá vel klædd en var að frjósa eftir klukkustund úti. Hvernig ætli ég verði í sjónum á morgun? Nauthólsvík kl. 12:15 á morgun, miðvikudag.

Austurvöllur kl. 9 í fyrramálið, bankamótmæli. Ég kemst ekki sjálf í það skiptið, en það verður fullt af settlegum konum og körlum eins og í morgun, mætið sem flest. Fjöldinn skiptir langmestu máli, jafnvel að standa bara álengdar og fylgjast með eins og ég gerði t.d. þegar hópurinn fór í að brjóta niður lokun götunnar þegar mótmælunum lauk í morgun. Mér dettur ekki í hug að lenda í slagsmálum, en mér dettur heldur ekki í hug að sitja heima og bíða þess að breytingarnar verði af sjálfu sér.

Lifið í friði.

8 Responses to “þriðjudagsmorgunn í Tjarnargötu”


  1. 2 baun 16 Des, 2008 kl. 7:57 e.h.

    hvar var mynd af þér, mig langar að sjá.

  2. 3 Einar Jónsson 16 Des, 2008 kl. 9:16 e.h.

    Þarftu ekki bara að fá þér bankaræningjalambhúshettu til að falla í fjöldann?

  3. 4 parisardaman 16 Des, 2008 kl. 10:45 e.h.

    Ég er í rauðri dúnúlpu og sést í öllum fréttatímum. Ég dæmi ekki þá sem vilja hylja andlit sitt, bæði er það skiljanlegt fyrir ýmsa og svo er líka ákveðin ögrun í því sem er ágæt en ég þarf ekki að fela mig.
    Frú Sigurbjörg, ég held ég hafi séð myndarlega manninn þinn með myndavél þarna en heilsaði honum samt ekki.

  4. 5 Guðný Anna 17 Des, 2008 kl. 12:11 f.h.

    Sæta rauðhettan þín. Og duglega. (Mætti ekki, gat ekki, get ekki heldur á morgun, en með í anda, sver og sárt við legg).

  5. 6 hildigunnur 17 Des, 2008 kl. 2:01 f.h.

    ég var aumingi í morgun og steinsvaf til nærri tíu. Glatað.

  6. 7 Frú Sigurbjörg 17 Des, 2008 kl. 1:11 e.h.

    Myndarlegi maðurinn minnist þess ekki að hafa verið á vappi þarna í kring með myndavél. En mér sýndist þú segja á hrognamálinu þú værir „hrottalega ómannglögg“ – ertu kannski búin að sjá mig e-r??

  7. 8 parisardaman 17 Des, 2008 kl. 1:48 e.h.

    Eins gott að ég sveif ekki á þann mann. Já, ég er ómannglögg með afbrigðum og þess vegna á að heilsa mér. Farin í sjóbað.


Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google photo

You are commenting using your Google account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s





%d bloggurum líkar þetta: