svik og prettir

Í gær bankaði fólk upp á hjá gömlu konunni sem býr á jarðhæð í blokkinni okkar. Þau voru tvö, en annað þeirra hélt sér til hlés og nágrannakonunni minni finnst eins og það hafi verið karl, klæddur í kvennmannsföt. Hún er þó viss um að sú sem sá um að tala var kona, sem byrjaði á því að kynna sig sem Christine, og spurði hvort Frú Michaud myndi ekki eftir henni. Frú Michaud neitaði því, en þá sagði Christine jú jú, og spurði hvort hún hefði ekki misst manninn sinn fyrir fimm árum síðan. Vesalings Frú Michaud játti því. Þá sagðist Christine vera í tengslum við Magali, sem býr á 2. hæð (þriðju í íslensku talið), sem er fasteignasali. Christine sagði að Magali hefði nýlega fundið atvinnuhúsnæði fyrir hana, en hún væri í smá peningavandræðum og að Frú Michaud yrði að hjálpa henni. Hvort hún væri ekki nú ekki með einhvern pening á sér, nágrannar hennar á móti hefðu lánað henni smá, en hana vantaði 300 evrur í viðbót. Hún myndi svo endurgreiða þær 29. nóvember, þegar hún fengi pening.
Eitt leiddi af öðru, Frú Michaud sem er bara svo yndisleg og trúir engu illu upp á nokkurn mann, skrifaði 300 evru ávísun fyrir konuhelvítið.
Það var miðvikudagur, sem er ekki skóladagur og barnafólkið í húsinu er á stöðugu renneríi inn og út, á leið með börnin í og úr hinum og þessum tómstundunum. Alveg hrikalegt að ekkert okkar átti leið hjá akkúrat meðan þau voru þarna hjá henni, sem Frú Michaud telur hafa verið korter.
Um leið og þau fóru, bankaði Frú Michaud upp á hjá nágrönnunum á móti. Þau voru ekki heima. Þá vissi hún, það sem hún vissi í raun allan tímann, að þetta var eitthvað svikadæmi. Ég kem heim um það leyti sem hún er að átta sig, búin að ná í Magali, sem stendur og er að fara yfir atburðarásina með henni. Magali var á náttfötunum, en þegar Frú Michaud er búin að lýsa konunni, hleyp ég af stað niður í banka, til að athuga hvort hún sé nokkuð þar að leggja inn ávísunina. Þar var enginn og ég sá enga sem gat passað við lýsinguna á leiðinni (og veit svo sem ekki hvað ég hefði átt að gera, ég bara sá rautt og var tilbúin að vaða í hvaða konu á gráum jakka með svarta tösku sem var). Á þeim tímapunkti vissum við ekki að þau hefðu verið tvö, sagan kom nefnilega smátt og smátt, við hverja upprifjun bættust við upplýsingar. Nú skil ég betur hvers vegna lögregla lætur fólk endurtaka sögurnar aftur og aftur.
Magali hringdi í bankann og bað um að láta stoppa ávísunina. Það kostar 10 evrur, sem er skárra en 300.

Um eftirmiðdaginn fór ég með Frú Michaud upp á lögreglustöð, því auðvitað varð að tilkynna þetta. Þar var nóg að gera, hundur hafði klórað mann í fótinn og eigandinn ekki beðist afsökunar, svo maðurinn vildi kæra, en var á endanum sannfærður um að fara bara og finna hundaeigandann og biðja hann um að biðja sig afsökunar. Ein hafði týnt pappírum, önnur kom með yfirlit yfir símareikning úr farsímanum sem var stolið í síðasta mánuði og blóðroðnaði þegar hún sagði að númerin sem hringt var í, voru allt í klámlínur. Kona sem greinilega mætir oft í viku, var komin til að láta vita að blómapottur hefði verið brotinn og blómin væru út um allt, og svo væru enn sígarettustubbar út um allt. Við Frú Michaud erum svo heppnar með stigagang, hér fá blómapottar að vera í friði og reykingafólkið notar öskubakka.

Lögreglumaðurinn sem tók við okkur var bæði vingjarnlegur og kunni að vélrita, og tölvan hans og prentarinn virkuðu (staðalímynd mín af löggunni brotnaði þarna í þúsund mola). Hann sagði okkur hins vegar að í raun hefði fólkið ekki brotið nein lög. Frú Michaud hleypti þeim inn til sín og skrifaði ávísunina án þess að nokkur neyddi hana til þess. Þar að auki hafði konan látið hana fá tvö ilmvatnsglös, svona drasl sem verið er að selja á mörkuðum hérna, svo í raun gætu þau haldið því fram að þetta hafi verið viðskipti. Og það sem við komumst líka að, er að í raun má bankinn ekki einu sinni stöðva ávísunina, af þessari sömu ástæðu. Hún skrifaði hana sjálfviljug og hefur ekki rétt til að taka það til baka. Peningurinn hefur verið afhentur og það er óafturkræft.
Þau ræddu þarna saman þrjú í smá tíma um mismunandi orðalag, misnotkun á trausti varð ofan á, og vonandi mun bankinn komast upp með að leysa ávísunina ekki út. Hins vegar verður ekki farið gegn fólkinu, nema mun fleiri tilkynningar berist inn á borð lögreglunnar á næstu dögum. Þá fyrst yrði málið tekið til rannsóknar sem svikamál.

Djöfull var ég reið. Ég er búin að jafna mig núna, en helvítis skítapakk er það sem nýtir sér veikleika gamallar ekkju og snuðar hana um pening. Og svakalega geri ég mér sífellt betur grein fyrir því hvað við búum í dásamlega góðu húsi. Við erum ólík, en öll svo kurteis og almennileg hvert við annað og aldrei neitt vesen. M.a.s. durturinn, Herra Sinnep, sem býr hér fyrir neðan okkur og öskrar svolítið mikið á unglingana sína og konuna (sem öskra á móti, svo því sé haldið til haga). Hann er alltaf brosandi og almennilegur og hefur ekki oft kvartað yfir hávaða frá okkur, þó ég viti að stundum eru krakkarnir dálítið háværir, og þegar við erum með matarboð fram yfir miðnætti, erum við beint yfir þar sem þau sofa, því þau eru fjögur svo til fullorðin, í 70 m2 íbúð og foreldrarnir sofa í borðstofunni.

Jájá, börnin góð. Svik og prettir eiga sér stað á mismunandi plani. Sumir svíkja heilu bankana af heilu þjóðunum, aðrir láta sér duga smærri afrek. Og svo er þetta allt sett þannig upp að í raun er þetta löglegt:

Þú lést mig fá draslilmvatn sem kostar eina evru og ég asnaðist til að láta þig fá 300 í staðinn, því ég var svo óviss, svo rugluð, þú talaðir svo mikið, og virtist svo viss í þinni sök, minntist á manninn minn heitinn …

Hvað var það aftur sem Björgólfarnir og allir hinir, sögðu við Íslendinga?

Lifið í friði.

10 Responses to “svik og prettir”


  1. 1 Harpa J 24 Nóv, 2011 kl. 10:11 f.h.

    Djöfulsins skítapakk. Bæði þessi og ,,hinir“. Og mikið er gott að þú gast hjálpað gömlu konunni með þetta. Það mættu vera fleiri eins og þú.

  2. 2 Hildur Lilliendahl 24 Nóv, 2011 kl. 1:03 e.h.

    Þetta er rosaleg saga. Takk, Kristín. Ég naut þess mjög að lesa þetta. Og þú mátt kyssa frú Michaud frá mér.

  3. 4 hildigunnur 25 Nóv, 2011 kl. 1:03 f.h.

    oj – vonandi geta þau ekki leyst ávísunina út!

  4. 5 baun 25 Nóv, 2011 kl. 11:10 e.h.

    Hef ég einhvern tímann sagt þér að þú ert hetjan mín? Jæja, þá var kominn tími til.

  5. 6 Eva 26 Nóv, 2011 kl. 1:47 f.h.

    Það er einmitt svona fólk sem grefur undan allri samhjálp og samfélagslegri ábyrgð. Hvernig á fólk að komast hjá því að verða tortryggið og tilbúið til að loka á þeim sem þurfa raunverulega á hjálp að halda þegar svona pakk veður uppi.

    Vona að blessuð konan beri ekki skaða af þessari greiðvikni sinni og frábært að til skuli vera nágrannar eins og þú, sem ganga bara í málið ef einhver verður fyrir skakkaföllum

  6. 7 parisardaman 26 Nóv, 2011 kl. 10:25 f.h.

    Já, það er allt of mikið af pakki í þessum heimi … allt of mikið af fólki sem finnst meira en sjálfsagt að stela. Urr, hvað það fer í mig.
    Frú Michaud ber sig vel. Fór í lagningu og er handviss um að ávísunin verði ekki greidd út. Magali er hins vegar alveg miður sín, mér sýnist hún þurfi meira á stuðningi að halda, en gamla konan. Ég kyssi þær báðar:)
    En plís, ekki gera mikið úr minni aðstoð, þetta er svo sjálfsögð hegðun og ég er viss um að þið allar hefðuð gert nákvæmlega það sama!

  7. 8 heiða 30 Nóv, 2011 kl. 8:47 e.h.

    vá, hvað ég sá þetta allt fyrir mér! geturðu knúsað Frú Michaud frá mér líka, lítilli stúlku á íslandi, sem gjörsamlega skilur bara alls ekki óheiðarleika, og er líklega næstum jafn hrekklaus og frú Michaud.

  8. 9 Glúmur 30 Nóv, 2011 kl. 9:00 e.h.

    Ef þessi pistill ***** væri til sölu mætti fljótt ná inn 300 €

  9. 10 Frú Sigurbjörg 3 Des, 2011 kl. 1:39 e.h.

    Mér leið eins og ég væri að lesa brot úr bók, vel skrifaður texti. Hefur þú velt því fyrir þér að skrifa bók?


Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google photo

You are commenting using your Google account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s





%d bloggurum líkar þetta: